Наша дзяржава робіць усё, каб кожнае дзіця было акружана клопатам і ўвагай. Гэта асабліва адчуваецца ў пераднавагодні час, калі дзеці чакаюць падарункаў і казачных цудаў. Вельмі важна, каб кожны хлопчык, кожная дзяўчынка маглі спаўна адчуць святочную атмасферу і паверыць у казку. Як і ва ўсёй краіне, на Ушаччыне праходзіць рэспубліканская дабрачынная акцыя «Нашы дзеці».Напярэдадні Новага года госці з падарункамі завіталі ў дом сямейнага тыпу ў аграгарадку Арэхаўна. Старшыня Ушацкага райвыканкама Віктар Віктаравіч Родзіч, старшыня раённага Савета дэпутатаў Вольга Мікалаеўна Захарэнка і начальнік аддзела адукацыі, спорту і турызму Іна Фёдараўна Сыроўчанка павіншавалі дзяцей з навагоднімі святамі, пажадалі здароўя і здзяйснення ўсіх мар. Дзеці атрымалі салодкія падарункі і спартыўны інвентар, а іх маці-выхавальніца Надзея Ігнатаўна Трэмбач — мультыварку, каб прасцей было накрываць стол на іх вялікую сям’ю. У сваю чаргу дзеці і гаспадыня падзякавалі Віктару Віктаравічу за пастаянны клопат і ўвагу.Шчырыя словы і пажаданні гучалі ў гэты ж дзень і ў дзіцячым сацыяльным прытулку гарпасёлка. На цяперашні час тут знаходзіцца трое дзетак. Як адзначыў старшыня райвыканкама, хацелася, каб прытулак пуставаў, а ўсе дзеці раёна выхоўваліся ў шчаслівых поўных сем’ях разам з татамі і мамамі. А паколькі гэта не ўдаецца, то кожнае дзіця будзе акружана
цеплынёй і пяшчотай, для іх будуць створаны ўсе ўмовы. У падарунак да Новага года дзеці атрымалі ад кіраўніцтва раёна салодкія наборы і спартыўны інвентар, а інтэр’ер прытулка ўпрыгожыць новы вялікі насценны гадзіннік. Дзеці шчыра падзякавалі за падарункі і, парадаваўшы прысутных навагоднімі вершамі, паспяшаліся хутчэй распакаваць новыя цацкі.
В.КАМАРКОВА.
