На партах – своеасаблівая фінансавая азбука, а ў ролі настаўнікаў – банкіры. На гэтым тыдні прадстаўнікі раённага аддзялення Белаграпрамбанка завіталі ў госці да пяцікласнікаў усіх сельскіх школ Ушаччыны. Галоўнай нагодай для такога візіту стаў выпуск дзіцячай брашуры «Твае першыя фінансы», падрыхтаванай банкам.
Урок фінансавай адукаванасці выклікаў цікавасць у хлопчыкаў і дзяўчынак. Яны ўважліва слухалі пра гісторыю ўзнікнення грошай, аб правілах бяспечнага карыстання банкаўскай карткай. Прыемным «бонусам» для школьнікаў сталі падарункі ад Белаграпрамбанка – календары, расклад заняткаў з сімволікай банка, флажкі і, вядома, самі брашуры.
– У сучасным свеце мала быць проста адукаваным чалавекам. Вывучаць фінансавую азбуку сёння не менш важна і карысна, чым звычайную, – сказала, звяртаючыся да вучняў, намеснік упраўляючага раённага аддзялення Белаграпрамбанка І.Б.Бурак. – А калі як не цяпер, са школьнай парты, пачынаць спасцігаць гэтую няпростую навуку?
Ірына Барысаўна падкрэсліла, што Белаграпрамбанк невыпадкова стаў арганізатарам акцыі. На працягу многіх гадоў пытанні падтрымкі і аказання дапамогі дзецям для банка з’яўляюцца важным накірункам работы. Акрамя аказання спонсарскай дапамогі маладзёжным праектам, конкурсам і ўстановам адукацыі, ствараюцца спецыяльныя банкаўскія прадукты для падрастаючага пакалення. У Белаграпрамбанку рэалізуецца рэкламная акцыя «Дзіцячая ашчадная праграма «Расці вялікі». Яе ўдзельнікі акрамя працэнтаў па ўкладзе атрымліваюць падарункі на кожны свой дзень нараджэння, карыстаюцца спецыяльным крэдытам на навучанне, могуць аформіць бясплатную банкаўскую плацежную картку, выйграць прызы. Усё гэта робіцца для таго, каб дзеці маглі на практыцы навучыцца карыстацца грашыма, планаваць свае расходы.
К.КАВАЛЕЎСКАЯ.
