З самай раніцы ў райаддзеле па надзвычайных сітуацыях было ажыўлена. Не, гэта была не падрыхтоўка выратавальнікаў да выезду на здарэнне – выхаванцы летняга лагера “Арляня” знаёміліся з тэхнікай, што знаходзіцца на ўзбраенні работнікаў службы, адпрацоўвалі навыкі завязвання вузлоў, абмяркоўвалі ўбачанае.
Аздараўленчы лагер, арганізаваны ва Ушацкай школе сумесна з райаддзелам па надзвычайных сітуацыях, штогод настолькі запатрабаваны, што адно ўзгадванне пра яго выклікае ў школьнікаў і іх бацькоў мноства станоўчых эмоцый. Фантазія ў важатых і выхавальнікаў надзвычай багатая, таму з першага да апошняга дня змены (сёлета з 2 па 25 чэрвеня) жыццё ў лагеры багатае на цікавыя падзеі. Розны ўзрост хлопчыкаў і дзяўчынак – лагер наведваюць вучні 5-8 класаў – не перашкаджае знайсці кожнаму занятак па душы з улікам інтарэсаў і схільнасцяў. Тут усё, як у вялікай дружнай сям’і: разам загартоўваюцца, арганізуюць і праводзяць мерапрыемствы і спартыўныя спаборніцтвы, наведваюць РАНС. Такая згуртаванасць – заслуга начальніка лагера і яго намесніка, педагогаў з вялікім стажам і важкім багажом ідэй Марыі Уладзіміраўны Ядрэўскай і Людмілы Сямёнаўны Варанько.
Не трэба хвалявацца бацькам пра харчаванне і здароўе дзяцей: побач з хлопчыкамі і дзяўчынкамі пастаянна знаходзяцца вопытныя педагогі, а повары радуюць традыцыйна разнастайным меню. Дарэчы, харчаванне ў лагеры “Арляня” – трохразовае бясплатнае.
Сваімі ўражаннямі ад прабывання ў ім падзялілася вучаніца 5 “А” класа Ушацкай школы Марыя Лукашэвіч:
Наш «Орлёнок» – просто класс!
В школьном лагере у нас
Много есть ребят хороших
И занятий разных тоже.
Мы ходили в РОЧС –
Впечатлений всех не счесть:
Здесь спасательный отряд –
Нет надёжнее ребят!
Всем желаю я, друзья,
Время провести не зря.
Падрыхтавала К.КАВАЛЕЎСКАЯ.
