Ранак. Сонца ўстае,
Ні хмурынкі ўгары.
Люд з царквы ўжо ідзе–
Вялікдзень на двары.
Не сціхае жаўрук–
Спеў, нібы Божы дар.
Валачобнікаў гурт
Сустракай, гаспадар!
Пачастункі вынось–
Пажадаюць табе,
Каб была ў цябе моц
І ў жніве, і ў сяўбе.
Каб у хаце тваёй
Толькі згода была
І каб радасць у ёй
Буйным кветам цвіла.
Ах, дзяцінства майго
Залаты ўспамін!
Не забыць мне яго
Да апошніх хвілін.
Цёплы подых вясны,
Валачобнікаў гурт–
Услаўляюць яны
Спевам Бога і люд.
Не памерці душы–
Гэтым днём уваскрос
Пасля мук на крыжы
Наш Заступнік – Хрыстос.
