На прыёмна-нарыхтоўчым пункце каапнарыхтпрама пазначана, што ён працуе з 8 гадзін, аднак трапіць у гандлёвую кропку ў названы час можна незаўсёды. Вось і ў сераду, 31 ліпеня, той, хто прыйшоў сюды з самай раніцы, быў вымушаны “пацалаваць замок” і вярнуцца дадому або выседжваць час ля суседняй бытоўкі ў чаканні адкрыцця пункта. З такой праблемай сутыкаюся ўжо не ў першы раз. Бывае, што кропка пачынае прымаць наведвальнікаў толькі гадзін у 9. Такое запаздалае адкрыццё прыёмшчык тлумачыць тым, што ў гэты час ён быў заняты іншымі службовымі справамі, скажам, пісаў справаздачу. Але прычым тут мы, простыя спажыўцы?
Яшчэ адзін праблемны нюанс, з якім давялося сутыкнуцца ў тым жа прыёмна-нарыхтоўчым пункце каапнарыхтпрама. Ведаў, што там закупляюцца ў насельніцтва свежыя агуркі – адпаведная аб’ява змяшчалася ў газеце “Патрыёт” за 13.06.2013, аднак якія канкрэтна, не ўказвалася. Аб тым, што прымаецца стандартная агародніна пэўнага памеру, даведаўся толькі непасрэдна на месцы плануемай здачы. Лічу, што гэта парушэнне правоў спажыўцоў: у прыгаданай аб’яве трэба было падрабязна праінфармаваць грамадзян аб патрабаваннях да прадукцыі.
А.ПАХІЛКА, г.п.Ушачы.
Каб разабрацца ў сітуацыі, мы звярнуліся да начальніка аддзела эканомікі Ушацкага райвыканкама Т.У.Дзямешкі, якая курыруе пытанні абароны правоў спажыўцоў у раёне. Таццяна Уладзіміраўна патлумачыла, што парушэнняў з боку работнікаў каапнарыхтпрама ў сітуацыі з прыёмам агуркоў няма: інфармацыя аб патрабаваннях да прадукцыі ў прыёмна-нарыхтоўчым пункце змяшчалася. Атрымаць яе можна было і па тэлефоне, указаным у аб’яве.
Як расказала вядучы таваразнаўца ПУП “Ушацкі каапнарыхтпрам” Марыя Аркадзьеўна Маковіч, прадукцыя, якую здае насельніцтва ў іх прыёмна-нарыхтоўчы пункт, ідзе для далейшай рэалізацыі насельніцтву праз гандлёвыя кропкі раёна. Менавіта таму прымаюцца толькі якасныя плады: цэлыя, спелыя, роўныя, не вялыя, даўжынёй да 11 см і таўшчынёй да 3,5 см. На сённяшні дзень закупачны кошт на агуркі тут складае 2,5 тысячы рублёў за кілаграм.
Падрыхтавала К.КАВАЛЕЎСКАЯ.
