“Прамая тэлефонная лінія” з чытачамі нашай газеты, якую праводзіў начальнік філіяла “Ушачы” ААТ “Аўтатранспартнае прадпрыемства №6 г.Наваполацк” А.В.БАРОДЗІЧ, праходзіла ў спакойным рэжыме. Са сваімі пытаннямі да Аляксея Васільевіча звярнуліся нямногія. Аднак пачуць адказы на іх, думацца, будзе карысна кожнаму жыхару нашага раёна.
– Некалькі разоў было такое, што, купляючы білет непасрэдна ў аўтобусе, ён абыходзіўся крыху танней, чым у касе аўтавакзала. З чым гэта звязана?
– Як у касе, так і ў аўтобусах дзейнічае адзіная сістэма аплаты праезду. Хутчэй за ўсё вадзіцель не выдаў вам білет, кладучы грашовыя сродкі сабе ў кішэню, ці вы атрымалі талончык да населенага пункта, які размешчаны бліжэй, чым было патрэбна. У любым выпадку такая “эканомія” не апраўдвае сябе. Перыядычна праводзяцца праверкі білетаў у пасажыраў грамадскага транспарту. Калі вы акажацеся ў ліку так званых “зайцаў”, вашы тлумачэнні наконт своечасова не выдадзенага вам талончыка не дапамогуць – прыйдзецца заплаціць немалы штраф. Акрамя гэтага безбілетны пасажыр не можа прэтэндаваць на страхавую кампенсацыю ў выпадку аварыі на лініі.
– Чаму на аўтобусным прыпынку ў Наваселлі няма раскладу руху грамадскага транспарту? Прыходзіцца пастаянна тэлефанаваць на аўтавакзал, каб даведацца аб часе прыбыцця аўтобуса.
– Замена таблічак на аўтобусных прыпынках праводзіцца рэгулярна. На жаль, новыя прыгожыя металічныя шыльды з раскладам руху транспарту доўга не жывуць – іх невядомыя асобы псуюць, ламаюць ці крадуць – відаць, з думкай, што ў гаспадарцы спатрэбіцца ўсё. Для нашай арганізацыі гэта сур’ёзная праблема: выраб і ўстаноўка новых шыльдаў – справа даволі клопатная і затратная. Час ад часу вывешваем расклад, надрукаваны на звычайных лістах паперы, аднак і яго зрываюць хуліганы.
Да канца І квартала бягучага года таблічкі з раскладам руху грамадскага транспарту будуць устаноўлены або абноўлены на ўсіх аўтобусных прыпынках Ушацкага раёна, у тым ліку і ў Наваселлі. Калі ж яны “працягнуць” нядоўга, прыйдзецца шукаць іншыя спосабы інфармавання насельніцтва. У вёсцы Ваўчо, напрыклад, гэта робяць так. Старэйшына названага населенага пункта перыядычна прыходзіць да нас, каб надрукаваць расклад у некалькіх экземплярах, і пільна сочыць за тым, каб патрэбная мясцовым жыхарам інфармацыя аб руху аўтобусаў пастаянна была на прыпынку.
– У дыспетчарскай аўтавакзала называюць толькі час адпраўлення аўтобуса ад пачатковай кропкі маршрута, яго прыбыцця ва Ушачы ці на канечны пункт. Чаму не гавораць, калі аўтобус прыбывае па раскладзе на іншыя прыпынкі?
– Дыспетчару агучваць інфармацыю аб часе прыбыцця і адпраўлення грамадскага транспарту па ўсіх прыпыначных пунктах раёна, а іх больш за 300 (!), па кожным маршруце не ўяўляецца магчымым. Так што шукайце неабходныя звесткі на шыльдах вашага прыпыначнага пункта.
Кацярына КАВАЛЕЎСКАЯ.
