З 15 мая афіцыйна пачаўся купальны сезон, і ўшацкія пляжы годна падрыхтаваліся да прыняцця адпачываючых. Напярэдадні ўзгаданай даты вадаёмы абследаваны вадалазамі – допуск спецыялістаў атрымалі пляжы на возеры Вечалле, ля лагера “Турасполле” на рацэ Дзіва і санаторыя “Лясныя азёры” на Должыцы. У аўторак пачалі несці сваю вахту на Вечаллі работнікі выратавальнага паста, а камунальная служба заканчвае добраўпарадкаванне пляжаў.
Дарэчы будзе нагадаць і асноўныя правілы бяспекі падчас знаходжання на вадаёмах. Забараняецца купацца ў нявызначаных для гэтага месцах: кар’ерах, саджалках, пажарных вадаёмах і г.д., распіваць на пляжы спіртныя напіткі і заходзіць у ваду ў стане ап’янення. Нельга пакідаць ля вадаёмаў дзяцей без нагляду дарослых. Смяротную небяспеку для жыцця ўяўляе плаванне на плытах, дошках, камерах і іншых падобных сродках. Хочацца спадзявацца, што надыходзячы летні сезон прынясе ўшачанам толькі станоўчыя эмоцыі.
Э.ВЕРТАШОНАК, старшыня раённага таварыства выратавання на водах.
